Name: Julia Breitwieser
Schule: HBLA Elmberg
Klasse: 4. Klasse

Wir lebn in ana schwaren Zeit, 
wos uns ah boid nimma gfreit, 
dass ma feiern oda lernan, 
und uns sche longsom vom richtigen Leben entfernan. 

Uns is wos gnumma woan! 
Wir hom olle irgendwie wos valoan. 
De Zeit is weg und wir wean oid,
es muas endlich wer laut schreien- HOIT! 

A schware Zeit-  
mittlerweile nimma nennenswert  
a Hin und Her, a Auf und Ab 
und ma merkt, de Zeit, de wird knapp. 

„Wieso denn des? Du host doch Zeit!”, 
heart ma von alt, jung, fern und weit. 
De Zeit is nimma des, wos amoi woa, 
vü z‘longsom und ah vü z‘schnö is vagongn des letzte Joahr. 

Mit Ach und Krach hom ma uns do durchegschlogn  
und hättn sicher weniger vo de gonzn Konferenzen vatrogn.
Vatrogn dan ma ned nua des Homeschooling schwer, 
sundan ah mitn Kontakteknüpfen häng ma hinterher. 

De gonzn Festln, Feiern, Vereinstätigkeit- 
ba de woan ma immer gern dabei mit Lustigkeit.  
Do hot ma Freind gfundn fürs Leben, 
owa de jetzige Phase is ned zum Anstreben. 

Wie scho gsogt - a schware Zeit 
mit ana ziemlich schoafn Schneid. 
Gscheid gwetzt is de woan, ned nur von da Politik 
wir olle hom drauf aufpassn meassn, dass ma se ned schneid, mit vü Glick. 

„A weng nu, a weng nu, es wird wieder bessa!”, 
heart mas von überoi, owa am liaban hätt is gfressa. 
Ma kon nimma, ma wü nimma 
und mit da Zeit hot ma wen gsuacht, auf den ma zagn ko min Finga. 
Wer woa denn des, wer is denn Schuid? 
Sche langsam reißt uns de Geduid! 

Wir homs fost gschafft! 
Und uns numoi aufgrafft. 
De Zeit bleibt ned steh, 
drum meas ma schnö hinter ihr geh.