Name: Sofia Limberger
Schule: HBLA Elmberg
Klasse: 4. Klasse
Montogmorgen. Siebn Uhr, da Wecka leit. Aufsteh, fertigmochen, frühstücken. De easte Onlinestund. Schaun, dass ma si konzentriert und nd eischloft. Kamera eischoidn und ausschaun wie ah Woschbär auf Koks. Danoch nu gnuag Aufgoben. Irgendwaun dazwischen wiads zum Mittogessen, daun geht’s schau wieda weida mid da Schui. Wenn ma Glick hod, is nimma vü und ma hod nu wos vom Nochmittog oda Obend. Fertigmochen zum Schlofen geh und ins Bett legn.
Dienstogmorgn. Siebn Uhr, da Wecka leit. Aufsteh, fertigmochen, frühstücken. De easte Onlinestund. Kamera eischoitn und jo nd eischlofn. Danoch nu gnuag Aufgoben. Irgendwann dazwischen wiads zum Mittogessen, daun geht’s schau wieda weida mid da Schui. Wenn ma Glick hod, is nimma vü und ma hod nu wos vom Nochmittog oda Obend. Fertigmochen zum Schlofen geh und ins Bett legn.
Mittwochmorgen. Siebn Uhr und so weida und so fort.
Distance Learning. Wos soit ma si do drunta vorstön? Augfaungt hods jo mid drei Wochn vor Ostern. Jetzt sitzn ma de gaunze Zeit vorm Laptop und woatn, bis dass da Tog ummi geht. Ermüdend. Kräfteraubend. Jeda red imma davau, dass am söbst so schlecht geht, wos ma nd ois vapasst oda wo ma nd jetzt grod hifoan und essen geh kunnt. Is ds ois wiaklich so schlecht und negativ, wie olle redn? Na und jo, najo hoid. I vamiss meine Freind. Normalerweise hod ma seine Leid de gaunze Wochn um an. Ma redt, hod ah Gaudi und locht hoid afoch gemeinsaum. Jetzt begrenzt si da Kontakt aufs Nochrichten schreiben und höchstens nu telefoniern. Wenn ma daun bei ana Schularbeit olle siagt, hod ma eha so sGfüh, wie wenn ma si nimma kennt. Die Jugend vapasst ihr beste Zeit. Vielleicht is ds jo so. Fortgeh und feiern darat i grod schau gaunz gern, oba is ds ois? Ah wenn dea gaunze Lockdown und de Ausgangbeschränkungen de meistn schau am Deckel foin, find i hods ah wos für sich. Mei Oma und mei Opa. Glücklicherweise wohnan sie bei uns im Haus, oiso hob i si jedn Tog gseng. Oma hod fia uns ob und zua kocht oda uns an Tee und Kuchen brocht und da Opa woa hoid da Gaudimocher und hod uns kurz vom Laptop befreit. Mei Kater. Ea woa in de tiefsten Verzweiflungen mei Beruhigung und hod ma, do bin i ma sicha, seelische Unterstützung geleistet. I hob erm maunchmoi gfrogt, ob ea ma nd höffn kau mid seina Weisheit, oba sei Blick hod ma leida nua varrotn, dass ea bitte dringend ah Fuadda braucht oda seine überlebensnotwendigen Streicheleinheitn. Mei Mama. Daher, dass si daham is, hobn ma imma gemeinsaum zMittog essen kinna. Ob und zua hobn ma frogen kinna, wenn ma si mid ana Aufgob nd auskennt hobn. Wia hobn si ah amoi aufregen kinna, wenn uns ah Lehra amoi gewoitig am Geist gaunga is. Daun hods uns ah Schokolad ois Nervennahrung mitgeben und uns gsogt, dass schau wiad und wenn des wea schofft, daun wia. Mei Papa. Najo, weil er oabeitn woa, hob i erm nd mea gsegn wia sunst, oba ois Frustabbauer und Muntamocha hod ea trotzdem hea hoidn deafn. Mei klane Schwesta. I hob mid ia parallel gleant, wia hobn gemeinsaum kocht, wia hobn gemeinsaum Füm gschaut. Hed i fia ds ois sunst ah so vü Zeit ghobt? Vamutlich nd. Noch am kompletten Schuitog is ma featig und wü eh nur mehr schlofn oda de Serie fertigschaun, an dea ma schau ewig sitzt. Gespräche mit de Eltern oda da klan Schwesta woan daun schau eha nervenbelastend ois wia stimmungsfördernd. Oiso wos kau ma aus dea Zeit mitnehma? I woas es nu nd, oba wos i woas is, dass ah wenn i gaunz sche vü vamiss, wos vorher so alltäglich woa, find i, hobn ma ds beste draus gmocht.
